Fyrir tveimur vikum yfirgaf ég þvottadrenginn og hélt í helgarferð norður í Skagafjörð til að rifja upp sveitastemminguna. Eitthvað hefur hún nú breyst síðan "Amma" var ung. Á hlaðinu var mér mætt með látum. Á ferðinni var nýjasta útgáfa af fuglahræðu. Þessi var rafknúin og gaf frá sér hljóð sem líktust helst því þegar þjófavarnarkerfi í bíl lætur ljós sitt skína. Hér gefur að líta myndband með herlegheitunum
http://www.clarratts.com/images/scare.mpeg Annars skilst mér í ljósi síðustu atburða að hlutverki hennar hafi verið breytt í ísbjarnarfælu þar sem ísbirnir séu í raun bölvaðar gungur.
Önnur nýjung sem ég tók eftir var að bændur virðast hafa tekið upp siði háskólanema og eru farnir að fara í svokallaðar "Vísindaferðir". Ég gat því ekki notið samvista við Sólheimafjölskylduna á sunnudaginum þar sem búið var að skilja börnin eftir í pössun og foreldrarnir farnir í bjórverksmiðuna sem framleiðir Kalda. Mér skilst að það hafi þó runnið af þeim á endanum og búið sé að setja út kýrnar og sláttur hafinn.

Á heiðinni hefur hann verið síðan í gær
fáeinir hestar, illa lyktandi ær
tugir manna á Toyotum þokast nær

Ég ætla aldrei, aldrei, aldrei aftur að skreppa í Skagafjörð
ætla með kíló af Kjörís út í náttúruna of fíla mig þar sem grasið ei grær

Þessi færsla er styrkt af Ben&Jerry's

Innihald: Vanilla Ice Cream with Marsmellow Swirls&White Chocolate Polar Bears.

Eitthvað finnst mér gestrisni Skagfirðinga hafa farið aftur. Það var allavega ekki vel tekið á móti bangsa litla í dag þegar hann kom að öllum líkindum röltandi úr Húnavatnssýslunni yfir í Skagafjörð. Hann hefur líklega farið fram hjá skiltinu á mörkum Húnavatnssýslu og Skagafjarðar þar sem segir "Velkominn í Skagafjörð", en skiltið prýðir mynd af hesti. Bangsi hefur því dregið þá ályktun að hér yrði vel tekið á móti honum og jafnvel boðið upp á hrossakjöt. Mér finnst að það eigi að draga sveitarfélagið Skagafjörð til ábyrgðar fyrir villandi upplýsingar, eða er kannski smátt letur á skiltinu sem segir " gildir ekki um þá sem eru hvítir, loðnir,þybbnir og eiga það til að ógna fullorðnum karlmönnum". Ég þori allavega ekki öðru en að sletta á mig brúnkukremi og raka fótleggina extra vel áður en ég skrepp í Skagafjörðinn um helgina. Allur er varinn góður!
Ég er svo sem ekki hissa að lögreglan hafi ekki tekið sénsinn á því að bangsi gæddi sér á einhverjum lögreglumanninum, þar sem erfiðlega hefur gengið að manna lögregluna á Sauðárkróki undanfarið. Ég held þó að aðrar og dýpri ástæður hafi legið að baki drápinu á bangsa litla. Skagfirðingum hefur nefnilega alltaf verið illa við Húnvetninga.